Нийслэлийн Аялал жуулчлалын газар, БНСУ-ын Чежү хотын Аялал жуулчлалын газар, “Чежү Олле” нийгэмлэгтэй хамтран Улаанбаатар хот орчимд Олле стандартын явган аяллын чиглэл /маршрут/ тогтоон тэмдэгжүүлэх ажлыг 2016 оноос эхлэн хэрэгжүүлж байгаа билээ.
Өнгөрсөн зун гадаад, дотоодын жуулчдад мэдээлэл өгөх зорилготойгоор Сөүлийн гудамжинд “Монгол Олле” Мэдээллийн төвийн Улаанбаатар хот дахь салбарыг нээн ажиллуулж байна.
Хамтын ажиллагааны хүрээнд “Монгол олле” явган аяллын замын төслийг дэмжихээр 16 хүний бүрэлдэхүүнтэй сайн дурынхан нэг жилийн хугацаатай Монгол Улсад ажиллахаар хүрэлцэн ирээд байна.
Сайн дурын ажилчид нь энэхүү хугацаанд тус явган аяллын замыг олон улсад сурталчлах, тохижуулах болон гадаад хэлний сургалтыг үнэ төлбөргүй зохион байгуулах зэрэг ажлыг хийх юм.
Энэхүү “Олле” гэх тэмдэглэгээт маршрутын замын гол агуулга нь байгальд ээлтэй алхах үүднээс тогтсон зам зааж чиглүүлэх, зам дагуух нутгийн иргэдийн амьжиргааг дэмжих үндсэн чиглэл ач холбогдолтой юм. БНСУ-д 2006 оноос хойш Чежү арлыг тойрсон 26 курс, 425 км явган аяллын чиглэлийг тэмдэгжүүлсэн байдаг байна.
НИЙСЛЭЛИЙН АЯЛАЛ ЖУУЛЧЛАЛЫН ГАЗАР
