Нийслэлийн Аялал жуулчлалын газар, БНСУ-ын Жежу хотын Аялал жуулчлалын газар, “Жежу Олле” нийгэмлэгтэй хамтран Улаанбаатар хот орчимд олле стандартын дагуу явган аяллын чиглэл тогтоон, тэмдэгжүүлэх ажлыг өнгөрсөн жилийн 6 дугаар сараас эхлэн хэрэгжүүлж байна. Олле гэдэг нь Жежүгийн эртний аялгаар “гудамж талбайгаас гэрийн хашаа хүртэлх нарийхан зам” гэсэн утгатай үг бөгөөд БНСУ-д 2006 оноос хойш Чежу арлыг тойрсон 26 курс, 425 км явган аяллын чиглэлийг тэмдэгжүүлсэн байдаг аж. Олле явган аяллын чиглэл нь Солонгос улсад хурдан хугацаанд хөгжиж, олон хүний алхах дуртай зам болсон бөгөөд зам дагуух тэмдэг, тэмдэглэгээ нь байгаль орчинд сөрөг нөлөөгүй материалуудаар хийгддэг. Оллэ стандартын дагуу тэмдэглэгээ хийхдээ зам дагуу шар, цэнхэр өнгийн тууз бүхий нарийхан шон хатгаж, тэмдэглэгээ тавих бөгөөд зөвхөн эхлэл, төгсгөл цэг дээр мэдээллийн самбарууд байрлана. Үүнээс гадна Оллэгийн үндсэн бэлгэ тэмдэг болох морь хэлбэртэй кансейг чиглэл заасан тэмдэг болгон ашигладаг. Оллэ явган аяллын замд байгалийн өнгө үзэмжийг өөрчлөх сандал, амрах цэгүүд зэрэг тохижилт хийдэггүй бөгөөд энэ нь хүмүүс алхахдаа байгальд ямар нэгэн ул мөр үлдээх ёсгүй гэдгийг илтгэх аж.
Явган аяллын замаар алхаж байгаа хүн орон нутгийн иргэдийн аж амьдралтай танилцаж, иргэдийн аж амьдралд бодит хувь нэмэр оруулах шаардлагатай гэж үздэг нь Оллэ стандартын гол онцлог. Жишээлбэл. Богд ууланд алхах хүмүүс аялалд гарахаас өмнө Хонхорт байрлах дэлгүүрүүдээс тодорхой хэмжээний худалдан авалт хийж, орон нутагт орлого оруулдаг. Энэ нь “аялагчид зөвхөн гоё байгальтай газраар алхах дуртай байдаг” гэсэн дэлхий нийтийн нийтлэг хандлагыг өөрчилж, Нутгийн иргэдэд түшиглэсэн аялал жуулчлалыг хөгжүүлэхэд тодорхой хэмжээний хувь нэмэр оруулж байна.
Өмнө Япон улсад нээгдсэн. Монгол улс олле явган аяллын стандартын замтай гурав дахь орон болж байгаа ба Горхи Тэрэлжийн БЦГ, Богд уулын ДЦГ-т тус бүр нэг нэг чиглэлийг тогтоож, тэмдэг, тэмдэглэгээ байрлуулах ажлыг эхлүүлсэн байна. 06 дугаар сарын 18, 19-нд Монгол Олле явган аяллын чиглэл нь нээгдэж, хүмүүс алхах ба зөвхөн нээлтийн арга хэмжээнд зориулж Солонгос улсаас 300 гаруй хүн ирж байна. Цаашид зөвхөн энэ замаар алхахаар Солонгос улсаас олон тооны жуулчид ирэх бөгөөд Монголчуудын хувьд мөн адил алхах дуртай газруудын нэг болно гэдэгт итгэлтэй байна.
