Монгол, Япон Улсуудын бүхий л салбарын харилцаа, хамтын ажиллагаа 1972 онд дипломат харилцаа тогтоосноос хойш эрчимтэй бөгөөд тогтвортой хөгжин 1996 оноос иж бүрэн түншлэлийн, 2010 оноос стратегийн түншлэлийн түвшинд амжилттай хөгжиж байна.
Нэн ялангуяа хоёр орны ард иргэдийн найрамдалт харилцаа бэхжин соёлын хамтын ажиллагаа өргөжиж байгаа билээ. Үүний тод илрэл бол Монголын ард иргэдэд Японы соёлыг түгээх 9 дэх удаагийн “Япон соёлын наадам 2018” арга хэмжээ юм.
Жил бүр улам өргөн дэлгэр зохион байгуулагдаж буй тус наадам нь их жанжин Д.Сүхбаатарын талбайд 9 дүгээр сарын 15-16-ны өдрүүдэд “Япон соёл, япон амт, япон чанартай танилцах ЯПОНЫ НЭГ ӨДӨР” уриан дор зохион байгуулагдана.
Хөтөлбөрт дараах арга хэмжээнүүд багтаж байна.
- Японы үндэсний урлагийн тоглолт
- Японы үндэсний тайко бөмбөрийн алдарт Индра хамтлагийн тоглолт
- Япон бараа бүтээгдэхүүний үзэсгэлэн худалдаа
- Японы олон төрлийн хоолны худалдаа
- Япон кимоно өмсөж зургаа авахуулах
- Японы наадам-мацуригийн хөгжөөнт тоглоом наадгай /супер болл, кендама/
- Японы мэргэжлийн үсчид үнэгүй үс засалт хийх
- Соробан сампингийн тэмцээн, танилцуулга
- Япон хэлний сургууль, боловсролын төвүүдийн танилцуулга
- Япон хэл сурагч оюутан, сурагчдын булан
- Япон аяллын танилцуулга
